Heb 4 | MHL | STEP | Aria Mua Maneka ona wameiya uurarowa yia maep koonowak nain opora naap ikua. Naapeya i maa uru-urufami ikaikua, oko ni mua papako emina kekanep Mua Maneka uurarowa yia maek nain ikip me fuunowa era-pa fuluw orowen.

Hebrews 4

Mua Maneka teeria uurarow epa aawimik

1 Aria Mua Maneka ona wameiya uurarowa yia maep koonowak nain opora naap ikua. Naapeya i maa uru-urufami ikaikua, oko ni mua papako emina kekanep Mua Maneka uurarowa yia maek nain ikip me

fuunowa era-pa fuluw orowen. ^{▼▼4.1Iiriw ekera wi Isrel Isip piipuamik nain Mua Maneka-ke Moses ne Yosua wia maakeya Kenan miiwa wia pikiwemik, neeke kererep baliwep ikauk naep. Nain wi emina kekanemik, naapeya Kenan miiwa me fuunemik. Aria mua parosifa fain siisimok nain uurarow epa maemi Mua Maneka owow iinan maek. Naapeya wi Yeesus opora kekanowa opimik nain neeke ikaikuan.} 2 Moram i Yeesusopor eliwa yia maakiwkin miimamik, iiriw wi Isrel Mua Maneka opora wiar miimam-ikemik naap. Wi miimam-ikemik, nain wi makena-ke me wiar naemik. Naapeyawi oboseramik. 3 Aria i aakisa Yeesus opor eliwa wiar opamik nain uurarow epa nain ikip fuuniyen. Uurarow epa ikua, moram Mua Maneka nain maemi maek,

“Yo kema bagiwirap opora koonowami maem, wi uurarow epa wia wuomam nain ikip me fuunikuan.”
(Someka 95.11)

Naap maek. O iiriw miiwa ne maa muutitik tawerar-ikiwok nain enakiwa me wuak, uuwowa welawami baliwep silewap uurarek. Naapeya i maiyen, uurarow epa ikua, nain wi me imenamik. 4 Moram Mua Maneka opor ara oko fofa ikur okaiwi-pa erup nain maek,

“O mauwowa oni-ikip uuwowa welawap fofa ikur okaiwi erup-pa uurarek.”
(Yenesis 2.2)

5 Neemi opor ara nain wi emina kekanemik nain feenap wia maek,

“Wi uurarow epa wia wuomam nain ikip me fuunikuan,”
(Someka 95.11)

naap maek. 6 Wi papako ikiwep uurarow epa nain imenikuan. Ne wi iiriw opor eliwa miimamik nain wi emina kekanep opora makena-ke me naemik nainwi ikip uurarow epa me imenamik. 7 Naapeya Mua Maneka-ke nainiw fofa oko pepekimok. Ne mokom unowa ikiweya Dewit kema iweya maek,

“Aakisa ni opora wiar miimap-na emina me kekaneka,”
(Someka 95.7-8)

naap maek. Opora “aakisa” maek nain kemena feenap, ni opora miimap aakisa kuisow opaka, opora naap.

8 Moram iiriw ekera Yosua eena wi Isrel wia pikiwok nain uurarow epa makena imenekamik-na Mua Maneka fofa oko nainiw me maekak. 9 Naapeya wi Mua Maneka teeria uurarow epa wiar ikua, Sabat-pa uurarimik naap. 10 Sira feenap, mua ikip uurarow epa-pa fuuniya nain ona uuwowa pun welawap uurariya, Mua Maneka uuwowa welawap uurarek naap. 11 Naapeya i kaasirarow marew topialow manekiw ikip uurarow epa-pa fuuniyen. Naeya mua kuisow emina kekanep me wakinok, wi iiriw eker mua eena emina kekanep ikiwep uurarow epa me imenamik naap.

12 Mua Maneka opora anane kekanowa naap ikok uuwam-ikaiya. Opora nain anim akena. Anima nain bainat anima iiwawun nomakek. Mua wia mikami kema kukusa ikua nain gone-pa fookap ikip iiwawun oon mikowawowa, ne oon tepak afila pun fookowa saarik. Fookap yiena kema suuwowa ne kookalowa yiar pupiya. 13 Maa unowa Mua Maneka onomakek nain maa kuisow kokot-ko me ikua, weetak. Maa unowa nain o mokoka-pa iiwawun ariman akena ikomakek. Sira unowa i onimik nain os-ke waisow yiar pupep mekawap mainon.

Yeesus yiena pris woos mua-ke

14 I pris woos mua yiar ikua, o iiriw owow iinan urupep Mua Maneka wameiya ikua. Nain Yeesus nanek, eena Mua Maneka Muuka nain. Naapeya i o opora makena-ke naemi kekanowa naap wiar opam-ikaikua. 15 Pris woos mua nain akimowa sira-sira wiar imenarem-ikua nain aakisa i akimowa yiar imenarem-ikaiya sira naap. Nain o iiriw nomakek, ne pina marew ikua. Naeya i pina-pa wakiemkun os-ke yia kemalep yia uumam-ikaiya. 16 Naapeya i Mua Maneka yia asipam-ikaiya naep o wameiya wiar ekikua. Ne o wameiya wiar ekiyen-na pina me yiar kema suuwowa yia kemalep yia asipinon.